بسم الله الرحمن الرحيم
أقول :
يا فلاح الهم خيم فوق قلبي يافلاح
كيف تبغاني اسولف وانت خابرني عليل
ويش قولك في عليل في حياته ما استراح
تنتثر دمعت عيونه لا أظلم الليل الطويل
حالته لا ماتباعد حال سلطان الرباح
بالخطى راحت حياته والخطى ماله مثيل
كان ويا صاحبه اثنين في أرض براح
يطردون الصيد دايم من صبح اين المقيل
أجمعتهم صحبة الدنيا على جد ومزاح
ما يهابون الليالي والحمول اللي تميل
ما قتل عامد ولكن ثور إبليس السلاح
بالخطى ثار السلاح وين يلقى له دليل
انعقد سجنه وربعه تنتظر فك الصراح
والأكيد أنه سجين وما رضوا ربع القتيل
هل دمعه يوم صلى ركعتين فالصباح
في نهار الجمعة أللي من ثقيل في ثقيل
هلل وكبر ونفسه تذكر أللي راح راح
كان في ربعه عزيز وذله الوقت الذليل
لا محمد لا تهاني لا سعود ولا صلاح
كلهم كانوا على باله وهمه في هديل
طفلة ماكملت عامين صايبها كساح
وانتثر دمعه وحاله من سبايبها نحيل
حان تنفيذ القصاص وغطوا الرأس بوشاح
وجاك سيافه يشيل السيف ذو حد صقيل
ارتخى رأسه وزاد الموقف الحامي صياح
بين نوح وبين دمع وبين صيحات وعويل
وأرتفع صوت الحشود وزادها محمد وصاح
يايبه تكفى دخيلك تستمع قول الدخيل
يايبه وشلون نصبر كيف نهجع بارتياح
وأنت من دنيا عيالك ما خذك مر الرحيل
يامحمد هاك علمي وأحفظه قبل المراح
أنتبه لإخوانك وبالك عليهم لا تعيل
والله الله فالصلاة و فالصيام والصلاح
والله الله فأمكم والله لكم من بعدي كفيل
وغمض عيونه ونفسه تطلب الله السماح
رافع سبابته مظلوم والله الوكيل
وسل سياف الصفا سيفه وطقه لين طاح
وطان المراجل وأنتثر دمه يسيل
غسلوه وكفنوه وفاح طيب السدر فاح
والمصادف صار قبره جنب قبر بن العقيل
يا فلاح الكارثة ماهي سوالف يا فلاح
خلني ساكت ودور غير هالقصة بديل
موضوع: قصيدة القصاص 
الأحد أغسطس 24, 2008 1:42 pm
